లగచర్ల ఘటనపై పది రోజుల్లో రిపోర్ట్ ​ఇవ్వండి..సీఎస్, డీజీపీకి జాతీయ ఎస్టీ కమిషన్ ​మెంబర్​ ఆదేశాలు

• సీఎస్, డీజీపీకి జాతీయ ఎస్టీ కమిషన్ ​మెంబర్ ​ఆదేశాలు
• బాధిత గ్రామాల నుంచి పోలీసులను పంపించాలని ఎస్పీకి ఆర్డర్స్ 

వికారాబాద్/కొడంగల్, వెలుగు: లగచర్ల ఘటనకు సంబంధించిన పూర్తి నివేదికను పది రోజుల్లో ఇవ్వాలని సీఎస్, డీజీపీలను జాతీయ ఎస్టీ కమిషన్​ సభ్యుడు జాటోతు హుస్సేన్​నాయక్​ఆదేశించారు. అప్పటివరకు గిరిజనుల అరెస్టులను ఆపాలని, కమిషన్​కు తెలియజేయకుండా ఎటువంటి చర్యలు తీసుకోవద్దని సూచించారు. సోమవారం వికారాబాద్​జిల్లా దుద్యాల మండలంలోని రోటిబండ తండా, లగచర్ల గ్రామాల్లో ఆయన పర్యటించారు.

దాడి వివరాలను గ్రామస్తులను అడిగి తెలుసుకున్నారు. ఈ సందర్భంగా పోలీసులు రాత్రి వేళల్లో వచ్చి భయపెడుతున్నారని గిరిజనులు గోడు వెల్లబోసుకున్నారు. భూములు ఇవ్వనందుకే కక్ష కట్టి అక్రమ అరెస్టులకు పాల్పడుతున్నారని ఆరోపించారు. పోలీసులు గ్రామాల్లోనే తిష్ట వేశారని చెప్పగా.. వెంటనే పోలీసులను ఖాళీ చేయించాలని వికారాబాద్​ఎస్పీ నారాయణరెడ్డిని ఎస్టీ కమిషన్​మెంబర్​అదేశించారు. అలాగే, లగచర్ల, హకీంపేట్, పోలేపల్లి, రోటిబండ తండా, పులిచర్ల తండాల్లో భూ సేకరణ ద్వారా ఏర్పాటు చేసే కంపెనీల గురించి ప్రజలకు స్థానిక ఎమ్మెల్యే అయిన సీఎం రేవంత్​రెడ్డి స్పష్టత ఇవ్వాలన్నారు.

కొందరు ఫార్మా, మరి కొందరు రకరకాల ఇండస్ట్రీలు వస్తాయని చెప్పడం గందరగోళానికి దారి తీస్తున్నదన్నారు. అభివృద్ధికి తాము వ్యతిరేకం కాదని.. కానీ, అమాయక గిరిజనులు నష్టపోకుండా ప్రభుత్వ చర్యలు ఉండాలన్నారు. భూములు కోల్పోయే వారికి  మార్కెట్​ రేటుతో సమానంగా పరిహారం చెల్లించాలని, లేకపోతే భూమికి బదులుగా భూమి ఇవ్వాలన్నారు. 

ప్రొటెక్షన్​ లేకుండా వెళ్లిన కలెక్టర్​దే తప్పు.. 

లగచర్ల ఘటనను పరిశీలిస్తే ఇంటెలిజెన్స్, పోలీసు వ్యవస్థ ఫెయిల్​అయిందని తెలుస్తోందని హుస్సేన్​నాయక్ అన్నారు. ఘటనకు ముందు రోటిబండ తండాలో లాఠీచార్జ్​ జరిగిందని.. అయినా కలెక్టర్​ ప్రొటెక్షన్​ లేకుండా వెళ్లడం తప్పని పేర్కొన్నారు. గతంలో అధికారంలో ఉన్న పార్టీ స్వలాభం కోసం గిరిజన బిడ్డల అమాయకత్వాన్ని ఆసరాగా చేసుకుని రాజకీయం చేయడం కరెక్ట్​ కాదన్నారు. హైదరాబాద్ మల్టీ జోన్​ 2 ఐజీ సత్యనారాయణ, జిల్లా గిరిజన అభివృద్ధి శాఖ అధికారి కమలాకర్​రెడ్డి హుస్సేన్​ నాయక్ తో ఉన్నారు.